Author: Mother See of Holy Etchmiadzin

Գարեգին Երկրորդ Ամենայն Հայոց Կաթողիկոսն ընդունեց հայագիտական և կրոնագիտական դասընթացներին մասնակցելու համար սփյուռքից Մայր Աթոռ ժամանած շուրջ 30 երիտասարդի։ Արդեն երկրորդ տարին իրականացվող դասընթացների նպատակն է խթանել արտերկրում ապրող երիտասարդների հայոց լեզվի ու պատմության իմացությունը և ամրապնդել կապը հայրենիքի հոգևոր-մշակութային ժառանգության հետ։ Հայոց Հայրապետի հետ հանդիպմանը երիտասարդները ներկայացան ու պատմեցին իրենց մասին, իսկ Նորին Սրբությունը հորդորեց նրանց ձեռք բերած գիտելիքները ծառայեցնել աշխարհասփյուռ համայնքներում ազգային-եկեղեցական կյանքի զորացմանը։ source

Այսօր Մայր Աթոռ Սուրբ Էջմիածնում հազարավոր հավատացյալների էր համախմբել Սուրբ Աստվածածնի Վերափոխման տոնը, որի առիթով Գարեգին Բ Ամենայն Հայոց Կաթողիկոսի հանդիսապետությամբ տոնական Պատարագ մատուցեց Հայկազուն արքեպիսկոպոս Նաջարյանը։ Պատարագի ավարտին հայրապետական թափորը շարժվեց դեպի Սուրբ Տրդատ Բաց Խորան, որտեղ Հայոց Հայրապետը կատարեց խաղողի օրհնության կարգը և, դիմելով իր աշխարհասփյուռ ժողովրդին, հորդորեց․ «Լավատեսությամբ շարունակեք շենացնել մեր երկիրը»։ Արարողությունից հետո օրհնված խաղողը բաժանվեց ժողովրդին։ source

Ամեն տարի, օգոստոսի վերջին կիրակի օրը Արագածոտնի մարզի Վարդենիս գյուղի Սուրբ Հակոբ եկեղեցու ուխտի օրն է։ Այս տարի լրանում է աղոթատան վերաօծման 14-րդ տարեդարձը։ Տոնական Սուրբ Պատարագը մատուցեց և հավատացյալներին օրհնեց հոգևոր հովիվ Տեր Մուշե քահանա Վահանյանը: Տոնի առիթով Սուրբ Նարեկ մատուռից եկեղեցի բերվեց 1710 թվականի հրաշագործ ու խնդրակատար «Պապեի Նարեկ» Ավետարանը, որին հաղորդակցվելու համար Վարդենիս էին այցելել բազմաթիվ ուխտավորներ ոչ միայն գյուղից, այլև Ապարանից և հարակից բնակավայրերից։ source

Հուլիսի 18-ին Հայ Առաքելական Սուրբ Եկեղեցին տոնախմբեց Սուրբ Թադեոս առաքյալի և Սանատրուկ արքայի դուստր Սուրբ Սանդուխտ կույսի՝ առաջին հայ մարտիրոսուհու հիշատակը: Մայր Աթոռ Սուրբ Էջմիածնի Մոմավառության աղոթասրահի Սուրբ Թադեոս մատուռում, որտեղ զետեղված է առաքյալի սրբազան մասունքը, Ամենայն Հայոց Կաթողիկոսի օրհնությամբ պատարագ մատուցեց Տեր Գրիգոր քահանա Հովհաննիսյանը: Հոգևոր դասն ու հավատացյալները աղոթեցին հավատի զորացման և Հայաստան աշխարհի խաղաղ կյանքի համար: source

Օգոստոսի 26-ին Մայր Աթոռ Սուրբ Էջմիածնում Գարեգին Երկրորդ Ամենայն Հայոց Կաթողիկոսի նախագահությամբ տեղի ունեցավ Գերագույն հոգևոր խորհրդի, հայաստանյան եպիսկոպոսների և թեմակալ առաջնորդների ժողով, որի ավարտին մասնակիցները հանդես եկան հայտարարությամբ։ ԳՀԽ-ն խոր ցավ հայտնեց Ազգային ժողովում Կառավարության ծրագրի քննարկման ընթացքում ՔՊ խմբակցության կողմից Հայոց Եկեղեցու հասցեին կրկին դրսևորված անընդունելի վարքագծի առնչությամբ՝ դատապարտելով իշխանությունների հակաեկեղեցական քաղաքականությունը, անհիմն մեղադրանքներն ու ներեկեղեցական կյանքին միջամտելու փորձերը և վերահաստատելով Եկեղեցու հավատարմությունն իր հոգևոր ու ազգային առաքելությանը։ source

Օգոստոսի 30-ին՝ Սուրբ Աստվածածնի Գոտուգյուտի տոնի առիթով, Մայր Աթոռ Սուրբ Էջմիածնում մատուցվեց Սուրբ Պատարագ՝ Տեր Վիրապ աբեղա Սարգսյանի ձեռամբ։ Պատարագից հետո, Ամենայն Հայոց Կաթողիկոսի հանդիսապետությամբ, տեղի ունեցավ կրթության մշակների օրհնության ավանդական կարգը։ Նոր՝ 2026-2027 թթ. ուսումնական տարեշրջանին ընդառաջ, Հայրապետական օրհնություն ստանալու նպատակով Մայր Աթոռ էին այցելել կրթական կառույցների ներկայացուցիչներ, մանկավարժներ, ինչպես նաև Էօրնեկյան հանրակրթական դպրոցի ուսուցչական կազմը։ source

Այսօր, օգոստոսի 21-ին լրանում է Գարեգին Երկրորդ Ամենայն Հայոց Կաթողիկոսի ծննդյան 75-ամյակը, որի կենսագրության մեծ մասը հոգևոր ծառայության նվիրյալ ճանապարհ է։ Լուսավորչի գահի 132-րդ գահակալը, աշխարհասփյուռ հայ եկեղեցու հովվապետը, շարունակում է իր կեսդարյա ճանապարհը որպես հեռատես հովիվ, հանձնառու եկեղեցապետ և հոգևոր հայր՝ հոգալով իր ժողովրդի ամեն ցավն ու կիսելով ամեն ուրախությունը։ source

Հուլիսի 12-ին Քրիստոսի Պայծառակերպության տոնի առիթով Էջմիածնի Մայր Տաճարում Գարեգին Երկրորդ Ամենայն Հայոց Կաթողիկոսի հանդիսապետությամբ մատուցվել է տոնական պատարագ: Պատարագիչ Գարեգին վարդապետ Համբարձումյանն իր քարոզխոսության ժամանակ անդրադարձել է Թաբոր լեռան վրա աշակերտներին Քրիստոսի աստվածային փառքով երևալու հիշատակությանը՝ նշելով, որ ամեն օրը կարող է փոխակերպվելու հնարավորություն տալ: Արարողության ավարտին Հայոց Հայրապետը Պայծառակերպության տոնի առիթով օրհնել է ժողովրդին: source

Մայր Աթոռ Ս. Էջմիածնի և ՀԲԸՄ Նորքի Հայորդյաց տան «Նարեկ» պարային դպրոցը Իտալիայի Պինետո քաղաքում անցկացված Կատարողական արվեստի միջազգային փառատոնից վերադարձել է հաղթանակով՝ արժանանալով Գրան պրիի՝ գլխավոր մրցանակի: 12 երկրից ժամանած խմբերի շարքում Հայաստանից մասնակցել է միայն «Նարեկ» պարային դպրոցը՝ 20 հոգանոց կազմով՝ ներկայացնելով «Ծաղկաձոր» և «Խիո» բեմադրությունները: Տարբեր երկրներում պարբերաբար հանդես եկող ու հաղթանակներով վերադարձող համույթի այս բոլոր ելույթներին, շրջագայություններին ու հաղթանակներին նախորդում ու հաջորդում է տևական, համառ աշխատանքը: source

Օգոստոսի 21-ին Մայր Աթոռ Սուրբ Էջմիածնում Գարեգին Բ Ամենայն Հայոց Կաթողիկոսին ծննդյան 75-ամյա հոբելյանի առիթով շնորհավորեցին եպիսկոպոսաց դասը, քահանաները, սարկավագները, աշխարհիկ պաշտոնեությունն ու Սփյուռքից ժամանած երիտասարդները: Հայրապետն իր երախտագիտությունն ու գնահատանքը հայտնեց ներկաներին՝ ընդգծելով, որ թե՛ անցյալում և թե՛ այժմ հոգևորականների ու աշխարհականների լծակից ջանքերով է ամուր մնում մեր հոգևոր ու ազգային կյանքը։ source