Author: Mother See of Holy Etchmiadzin

Տավուշի թեմի Նոր Վարագավանք վանական համալիրում սեպտեմբերի 27-ին նշվեց Վարագա Սուրբ Խաչի տոնը, որի առթիվ Մայր Աթոռ Սուրբ Էջմիածնից բերված Խաչափայտի մասունքը մեկ օրով հանգրվանեց այստեղ: Տոնական Սուրբ Պատարագ մատուցեց Տեր Եղիա քահանա Փահլևանյանը։ Այս տարի տոնը համընկավ նաև 44-օրյա պատերազմի մեկնարկի տարելիցի հետ, ինչի կապակցությամբ Տավուշի թեմի առաջնորդական տեղապահ Տեր Սամվել վարդապետ Մխիթարյանը հոգևոր դասի հետ կատարեց հոգեհանգստյան կարգ՝ պատերազմում նահատակված հերոսների հոգիների խաղաղության համար։ source

Սեպտեմբերի 28-ին Մայր Աթոռ Սուրբ Էջմիածնում Գարեգին Երկրորդ Ամենայն Հայոց Կաթողիկոսն ընդունեց Կանադայի Հայոց թեմի «Հայ Արդ Տուն» կազմակերպության նախաձեռնած ուխտագնացության մասնակիցներին։ Հայոց Հայրապետը գնահատանքով անդրադարձավ կանադահայության եկեղեցասիրությանն ու հայրենանվեր ոգուն, կարևորեց ուխտագնացությունների դերը հավատքի զորացման և ազգային ինքնության պահպանման գործում և հորդորեց ուխտավորներին առանձնակի հոգածություն ցուցաբերել երիտասարդ սերնդի հայեցի ու քրիստոնեական դաստիարակության համար։ source

Սեպտեմբերի 28-ին Գարեգին Երկրորդ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց ՀՅԴ Հայ դատի հանձնախմբերի ու գրասենյակների համահայկական խորհրդաժողովի մասնակիցներին։ Հանդիպմանը քննարկվեցին Հայաստանի առջև ծառացած մարտահրավերները, բռնի տեղահանված արցախահայության իրավունքների պաշտպանության, Ադրբեջանում պահվող հայ գերիների ազատ արձակման և Արցախի հոգևոր-մշակութային ժառանգության պահպանության խնդիրները, ինչպես նաև Հայոց Եկեղեցու դեմ իշխանությունների սանձազերծած դատապարտելի արշավը։ source

Սուրբ Գևորգ Զորավարի տոնի առիթով սեպտեմբերի 26-ին Արագածոտնի մարզի Գառնահովիտ գյուղի 7-րդ դարի Սուրբ Գևորգ եկեղեցում մատուցվեց տոնական Սուրբ Պատարագ և նշվեց սրբավայրի ուխտի օրը։ Խնդրակատար սրբի տոնին Պատարագ մատուցեց Տեղերի հովվության հոգևոր հովիվ Մխիթար քահանա Ահարոնյանը, ով քարոզում ընդգծեց Սուրբ Գևորգի անկոտրում քաջության, նվիրումի և հայրենյաց պաշտպանության արդիական պատգամը։ source

🟣 «Ազգը զորեղ է, և պետությունը՝ անսասան, երբ անխաթար են նվիրական արժեքները, ավանդույթներն ու նախնյաց ժառանգությունը, երբ որևէ պատրվակով չի ձևախեղվում պատմական հիշողությունը, կասկածի տակ դրվում մեր Սուրբ Եկեղեցու բազմադարյա առաքելությունը»։ Գարեգին Բ Կաթողիկոս Ամենայն Հայոց source

ՀՀ Գիտությունների ազգային ակադեմիայում սեպտեմբերի 28-ին տեղի ունեցավ Մխիթար Սեբաստացու ծննդյան 350-ամյակին նվիրված հոբելյանական նամականիշի հանդիսավոր մարման արարողությունը, որին հաջորդեց գիտաժողով։ «Հայփոստ»-ի և Վատիկանի փոստի համատեղ թողարկմանն ու միջոցառմանը մասնակցում էին հոգևորականներ, պետական ու մշակութային գործիչներ և դիվանագիտական առաքելությունների ներկայացուցիչներ։ source

Մայր Աթոռ Սուրբ Էջմիածինի տեղեկատվական համակարգը հանդես է եկել հայտարարությամբ՝ հակասահմանադրական, հակականոնական և անօրինական որակելով ՀՀ Կառավարության հրապարակած Հայաստանյայց Առաքելական Սուրբ Եկեղեցու մասին «զեկույցը», որը գնահատեց որպես Եկեղեցու ներքին կյանքին քաղաքական հաշվեհարդարի ու դատապարտելի միջամտության դրսևորում։ Մայր Աթոռը վերահաստատեց Ավստրիայի Սանկտ Փյոլթըն քաղաքում գումարված Եպիսկոպոսաց հավաքի դիրքորոշումը, ըստ որի ՀՀ իշխանությունները պետք է դադարեցնեն Եկեղեցու հանդեպ հալածանքները և հարգեն նրա դարավոր ինքնիշխանությունն ու ինքնավարությունը։ source

Սեպտեմբերի 26-ին՝ Սուրբ Գևորգ Զորավարի տոնի առիթով, Կարբիի Սուրբ Աստվածածին եկեղեցուց Արագածոտնի թեմի վարչական խորհրդի ատենապետ Տեր Շնորհք աբեղա Պալոյանի առաջնորդությամբ մեկնարկեց ուխտերթ դեպի Մուղնու Սուրբ Գևորգ եկեղեցի, որին մասնակցեցին թեմի քահանաներ, միանձնուհիներ, երիտասարդաց միությունների անդամներ և հավատացյալներ։ Մուղնու Սուրբ Գևորգ եկեղեցում, ուր ամփոփված են Զորավարի սրբազան մասունքները, Տեր Մանուկ քահանա Զեյնալյանը մատուցեց Սուրբ և անմահ Պատարագ։ Հաջորդ ուխտագնացությունը սպասվում է հոկտեմբերի 10-ին՝ Թարգմանչաց տոնին, դեպի Օշականի Սուրբ Մեսրոպ Մաշտոց եկեղեցի։ source

source

Սեպտեմբերի 22-ին Աշտարակի Սուրբ Մարիանե եկեղեցում մատուցվեց տոնական Պատարագ՝ նվիրված սրբուհիներ Փեփրոնեի, Մարիանեի և սուրբ Շուշանիկի հիշատակության տոնին, որը նաև եկեղեցու ուխտի օրն է։ Արագածոտնի թեմի առաջնորդ Մկրտիչ եպիսկոպոս Պռոշյանի օրհնությամբ պատարագը մատուցեց Մայր Աթոռ Սուրբ Էջմիածնի լուսարարապետ Տեր Անանիա եպիսկոպոս Ծատուրյանը՝ Արագածոտնի թեմի քահանաների, Ղազարավանի մենաստանի միանձնուհիների և բազում ուխտավորների մասնակցությամբ։ source