Author: Mother See of Holy Etchmiadzin

Մայր Աթոռ Սուրբ Էջմիածինը սեպտեմբերի 14-ին հանդես է եկել հայտարարությամբ՝ խստորեն դատապարտելով Ադրբեջանի նախագահի օգնական Հիքմեթ Հաջիևի՝ Գանձասարի և Դադիվանքի վանական համալիրներ կատարած այցի ընթացքում հայկական պատկանելությունը ժխտող հայտարարություններն ու հայ ժողովրդի հոգևոր-մշակութային ժառանգության հանդեպ դրսևորված հեգնական վերաբերմունքը։ Մայր Աթոռը կոչ է անում միջազգային հանրությանն ու ՀՀ իշխանություններին գործուն քայլեր ձեռնարկել՝ կանխելու Արցախի հայկական հոգևոր ժառանգության հետագա ոչնչացումն ու յուրացումը։ source

Սեպտեմբերի 21-ին Թալինի խոշորացված համայնքի Արագածավան գյուղում նշվեց Սուրբ Ամենափրկիչ եկեղեցու օծման տարեդարձը։ Այդ առիթով Արագածոտնի թեմի քահանաները Մայր Աթոռ Սուրբ Էջմիածնից եկեղեցի բերեցին Տիրոջ Սուրբ Խաչափայտի մասունքը։ Պատարագիչը Տեր Հայկ քահանա Սահակյանն էր, ով իր քարոզում նշեց, որ օրը համայնքի կյանքում դարձավ եռատոն՝ միավորելով եկեղեցու օծման տարեդարձը, Հայաստանի անկախության 35-ամյակը և Խաչափայտի մասունքն առաջին անգամ եկեղեցում ընդունելու ուրախությունը։ source

Սեպտեմբերի 13-ին՝ Սուրբ Խաչի տոնի օրը, Արագածոտնի թեմի Ափնա գյուղի Զորավոր Սուրբ Աստվածածին եկեղեցում մատուցվեց Սուրբ և Անմահ Պատարագ՝ ձեռամբ Տեր Մաղաքիա քահանա Գևորգյանի։ Հավատացյալները հաղորդվեցին Մայր Աթոռ Սուրբ Էջմիածնից բերված Հիսուս Քրիստոսի Խաչափայտի մասունքին։ Այս օրը եկեղեցում նշվեց սրբավայրի օծման տարեդարձը, որը 5 տարի առաջ օծել էր թեմի առաջնորդ Մկրտիչ եպիսկոպոս Պռոշյանը։ source

Սեպտեմբերի 4-ին Մոսկվայի հայկական եկեղեցու «Տապան» թանգարանում Ռուսաստանի և Նոր Նախիջևանի հայոց թեմի առաջնորդ Տեր Եզրաս արքեպիսկոպոս Ներսիսյանի նախաձեռնությամբ անցկացվեց քրիստոնեական 5 եկեղեցիների մասնակցությամբ հոգևոր երգի փառատոն, որին մասնակցեցին ավելի քան 150 երգիչներ։ Փառատոնը, որը նվիրված էր Ռուսաստանի Դաշնության ժողովուրդների միասնությանը, ամփոփվեց 5 երգչախմբերի համատեղ կատարմամբ՝ Հենդելի «Ալելույա» ստեղծագործությամբ, որը դարձավ ներդաշնակության ու միասնության խորհրդանիշ։ source

Սեպտեմբերի 15-17-ը Մայր Աթոռ Սուրբ Էջմիածնում, Գարեգին Երկրորդ Ամենայն Հայոց Կաթողիկոսի նախագահությամբ, տեղի ունեցավ Գերագույն հոգևոր խորհրդի հերթական ժողովը, որին մասնակցում էին նաև Կ. Պոլսի և Երուսաղեմի Հայոց Պատրիարքությունների ներկայացուցիչները։ Ժողովականները քննարկեցին Ազգային ժողովում և Կառավարության ծրագրում Հայ Եկեղեցուն վերաբերող դրույթները, և ԳՀԽ-ն անընդունելի ու դատապարտելի համարեց իշխանությունների կողմից Եկեղեցու ներքին կյանքին միջամտելու քաղաքականությունն ու սահմանադրական կարգավիճակի ոտնահարումը։ source

Սեպտեմբերի 8-ին Սուրբ Էջմիածնի Մայր Տաճարում Տեր Անդրեաս վարդապետ Եզեկյանի ձեռամբ մատուցվեց տոնական Սուրբ Պատարագ՝ նվիրված Սուրբ Մարիամ Աստվածածնի ծննդյան տոնին։ Քարոզխոսության ընթացքում պատարագիչն անդրադարձավ Աստվածամոր սիրված կերպարին՝ ընդգծելով, որ նրա ծնունդը մարդկության փրկության շղթայի կարևորագույն օղակներից է։ source

Մայր Աթոռ Սուրբ Էջմիածնում Ամենայն Հայոց Կաթողիկոսն ընդունեց «Մի գորգի պատմություն» նախաձեռնության մասնակիցներին, ովքեր Հայորդյաց տների հոգևոր տեսուչ Տեր Հարություն վարդապետ Կիրակոսյանի առաջնորդությամբ Հայոց Հայրապետին ընծայեցին Արաբկիրի Հայորդյաց տան սաների՝ մեկ ուսումնական տարվա ընթացքում գործած ինքնատիպ վիշապագորգը։ Նորին Սրբությունը շնորհակալություն հայտնեց ՀԲԸՄ-ին ու նախաձեռնության մասնակիցներին և իր օրհնությունն ու գնահատանքը փոխանցեց Հայորդյաց տների հոգևոր տեսչին, քահանայից դասին, տնօրեններին ու մանկավարժներին։ source

այաստանի անկախության 35-րդ տարեդարձի առիթով Գարեգին Երկրորդ Ամենայն Հայոց Կաթողիկոսի հանդիսապետությամբ Մայր Աթոռ Սուրբ Էջմիածնում սեպտեմբերի 21-ին տեղի ունեցավ հանրապետական մաղթանք, որի ընթացքում հոգևորականաց դասը և ժողովուրդն աղոթք բարձրացրեցին ՀՀ անսասանության ու խաղաղության համար։ Հայրապետական ուղերձում Նորին Սրբությունը կոչ արեց մնալ միասնական ու համախմբված՝ դիմագրավելու ներքին և արտաքին սպառնալիքները և պաշտպանելու ժողովրդի ազատ ու անվտանգ կյանքի իրավունքը։ source

Սեպտեմբերի 17-ին Մայր Աթոռ Սուրբ Էջմիածնում Ամենայն Հայոց Կաթողիկոսն ընդունեց «Ամրոց» հիմնադրամի կազմակերպած «Նոյան երկիր. Քրիստոնեությունը հետմոդեռնիզմից հետո» միջազգային համաժողովի մասնակիցներին։ Ողջունելով համաժողովի անցկացումը՝ Վեհափառ Հայրապետն անդրադարձավ Հայաստանյայց Առաքելական Սուրբ Եկեղեցու կարևոր առաքելությանը հայ ժողովրդի կյանքում և մաղթեց մասնակիցներին արդյունավետ աշխատանք։ source

Սեպտեմբերի 1-ին Մոսկվայի կենտրոնում գործող Սուրբ Գրիգոր Նարեկացու անվան վարժարանը կրկին բացեց իր դռները սաների առաջ, եւ տոնական մթնոլորտում տնօրեն Սյուզաննա Ադամյանցը փոխանցեց Վեհափառ Հայրապետի օրհնության խոսքը՝ մաղթելով եռանդ ու ջանասիրություն ուսումնառության մեջ։ Աշակերտներն այստեղ, ազգային ինքնությունը պահպանելով, ստանում են ՌԴ կրթական չափորոշիչներին համապատասխան բարձրորակ կրթություն՝ ուսումնասիրելով նաև մայրենի լեզու, հայ գրականություն ու հայ ժողովրդի պատմություն, իսկ նոր ուսումնական տարվանից նաեւ՝ չինարեն եւ արաբերեն։ source