Հայաստանի տնտեսական բոլոր նպատակներին հասնելու բանալին հանքարդյունաբերությունում է. Ջհանյան

Հայաստանն ունի լեռնահանքային հսկայական ներուժ, որն առայժմ հեռու է ամբողջությամբ օգտագործվելուց։ Հենց լեռնահանքային ոլորտի զարգացումն է ընդունակ պետությանը բերել միլիարդավոր դոլարների եկամուտներ, որոնք կարելի է ուղղել ռազմավարական ուղղությունների ֆինանսավորմանը՝ բարձր տեխնոլոգիաներից մինչև պաշտպանական արդյունաբերություն։ Այսպիսով, լեռնահանքային ոլորտը կարող է դառնալ երկրի տնտեսական աճի գլխավոր շարժիչներից մեկը։ Այսպիսի կարծիք է NEWS.am Tech-ի հետ զրույցում հայտնել Զանգեզուրի պղնձամոլիբդենային կոմբինատի գլխավոր տնօրենի առաջին տեղակալ և Հայաստանի հանքարդյունաբերության և մետալուրգիայի ասոցիացիայի նախագահ Վարդան Ջհանյանը։
Նրա խոսքով՝ այն պատկերացումը, թե Հայաստանը փոքր երկիր է՝ սահմանափակ հնարավորություններով, սխալ է։
«Մի՞թե Կանադան փոքր երկիր է։ ԱՄՆ-ի համեմատ այն զգալիորեն փոքր է, սակայն հանդիսանում է աշխարհի ամենազարգացած տնտեսություններից մեկը, և այդ զարգացման հիմքը դարձել է հենց լեռնահանքային արդյունաբերությունը», — նշել է նա։

source