Իրանի առաջին փոխնախագահ Մոհամմադ Ռեզա Արեֆը Երևանում մասնակցել է ԵԱՏՄ վարչապետների հավաքին ու նաև հայտարարել, որ հաջորդ քայլը կլինի ԵԱՏՄ-ին Իրանի անդամակցության հայտը: Իրանի առաջին փոխնախագահը ԵԱՏՄ վարչապետների հավաքի առիթով Հայաստան է ժամանել Նիկոլ Փաշինյանի հրավերով, սակայն կասկած չկա, որ այստեղ խոսքը հավաքականորեն համաձայնեցված գործողության մասին է, ինչը միանգամայն տրամաբանական է: Ինչպես հայտնի է, ներկայումս Իրանն ու ԵԱՏՄ-ն ազատ առևտրի ռեժիմում են: Երևանում փաստացի ազդարարվում է ԵԱՏՄ-ին Իրանի անդամակցության հայտի՝ օրակարգում լինելու մասին:
Այս հանգամանքը ուշագրավ «կորելացիայի» մեջ է այն իրադարձությունների հետ, որ ծավալվում են Իրանի հարավային ուղղությամբ՝ իսրայելա-լիբանանյան կամ իսրայելա-հըզբոլլահյան ճակատում: Անշուշտ, պատկերացնել, որ Իրանը հարավից եկող ճնշմանը հակազդելու համար հյուսիսում օրակարգ է բերում ԵԱՏՄ-ին անդամակցումը, կլինի միամտություն: «Կորելացիայի» մասին խոսքը , անշուշտ, պայմանական իմաստով է:
Պարզապես ծավալվող իրադարձությունները խորքային առումով կարող են հատվել եվրասիական անվտանգության համակարգի վերափոխումների կետում, որտեղ ծավալվում են ուշագրավ զարգացումներ: Արաբական Միացյալ Էմիրությունների նախագահը այդ պետության ստեղծումից՝ 1971 թվականից ի վեր առաջին անգամ պաշտոնական այց էր կատարել Միացյալ Նահանգներ, որտեղ նրա հետ հանդիպմանը նախագահ Բայդենը ԱՄԷ-ն գնահատել էր ԱՄՆ արտադաշինքային դաշնակից, ինչը թույլ է տալիս իրականացնել ռազմական սերտ գործակցություն: Իսկ այդ առումով շատ ուշագրավ է այդ այցին ժամանակագրական առումով հաջորդած տեղեկություն: Մի շարք ընկերություններ Աբու Դաբիի հետ քննարկում են ԱՄԷ-ում չիպերի արտադրություն հիմնելու հարցը, որը թույլ կտա Էմիրություններին դառնալ արտադրության կենտրոնական երկիր:
Սա նշանակում է ԱՄԷ նոր դերակատարում ռեգիոնալ և միջազգային անվտանգության համակարգում: Կասկածից վեր է, որ այս հանգամանքը մտահոգում է Իսրայելին և Թել Ավիվի ներկայիս ռազմարշավը նաև պայմանավորված է այդ տրանսֆորմացիոն միտումներով, ուժերի հարաբերակցության այդ փոփոխությամբ: ԱՄԷ նոր դերը, անշուշտ, մտահոգելու է նաև Իրանին, որը, բնականաբար, պետք է մտորի համակարգային անվտանգության իր տարբերակի մասին: Ահա այդ առումով, երբ Իրանը խոսում է ԵԱՏՄ անդամակցության հայտնի մասին, սրա տակ պետք է դիտարկել նաև համարժեք անվտանգության համակարգի ուրվագիծ:
Աշխարհում տնտեսական և ռազմա-քաղաքական բլոկների զուգահեռը որոշակի օրինաչափություն է, ինչպես ՆԱՏՕ-ԵՄ: Նույնականացում չէ, բայց կա համադրելիության բարձր աստիճանի օրինաչափություն: Անվանական կամ ցուցանակային իմաստով այդպիսին են ԵԱՏՄ-ն ու ՀԱՊԿ-ը, սակայն գործնական իմաստով այստեղ համադրելիությունը բոլորովին բարձր չէ: Եթե Իրանը խոսում է ԵԱՏՄ հայտի մասին, ապա անկախ դրա ճակատագրից, սցենարային մակարդակում պետք է դիտարկվի նաև անվտանգային համադրելի մեխանիզմի հարցը, ինչը կարող է նշանակել, որ մեծ հավանականությամբ ժամանակի մեջ դրան հաջորդելու է ՀԱՊԿ տրանսֆորմացիայի օրակարգը:
