ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: Մոսկվայում հոկտեմբերի լույս 4-ի գիշերը 90 տարեկանում վախճանվել է Ռուսաստանի վաստակավոր նկարիչ, մուլտիպլիկատոր Մարինա Ոսկանյանցը: «Արմենպրես»-ի հաղորդմամբ՝ այս մասին իր տելեգրամյան ալիքում հայտնել է «Սոյուզմուլտֆիլմ»-ի գլխավոր խմբագիր Սերգեյ Կապկովը:
Մարինա Ոսկանյանցը 1959-91 թվականներին աշխատել է «Սոյուզմուլտֆիլմ»-ում։ Նրա ձեռամբ են ստեղծվել միլիոնավոր մանուկների և մեծերի սիրված շատ մուլտհերոսների և մանկական ֆիլմերի հերոսների կերպարները: Տաղանդավոր հայուհին է պատկերել «Մատնաչափիկը», «Երեքը Պրոստոկվաշինոյից», «Երրորդ մոլորակի գաղտնիքը», «Մարդուկ-կոտրուկը», «Կար-չկար մի շուն կար», «Կախարդական մատանին», «Լոլո պինգվինիկի արկածները» մուլտֆիլմերի հերոսներին: Ոսկանյանցը եղել է նաև «Երեք հաստլիկները» ֆիլմի նկարիչը:
Նա մասնագիտացել է հիմնականում պարային տեսարանների ստեղծման դրվագներում: Դասավանդել է Կինեմատոգրաֆիայի համառուսաստանյան պետական համալսարանում (ВГИК): Արժանացել է պետական մրցանակների:
